Մեկ է` շները մարդկանց բարեկամներն են

Շների արտաթորանքը թունավորում է քաղաքի բնակիչների կյանքը. նման եզրակացության են եկել Կոլումբիայի Բոուլդեր համալսարանի մասնագետները, ովքեր ուսումնասիրել են օդի աղտոտվածության աստիճանը Քլիվլենդում եւ Դեթրոյթում, որտեղ շներն առավելապես շատ են:

Ինչպես տեղեկացնում է doctors.am-ը, գիտական աշխատանքի ընթացքում մասնագետները հավաքել են օդի նմուշներ և' ամռանը, և' ձմռանը: Արդյունքում` օդում հայտնաբերվել են մեծ քանակությամբ բակտերիաներ: Մասնագետներն ուսումնասիրել են բակտերիաների ԴՆԹ-ն ու համեմատել դրանք հողում, խոտերում ու արտաթորանքում բնակվող բակտերիաների ԴՆԹ-ի հետ: Պարզվել է, որ Դեթրոյթի և Քլիվլենդի օդի նմուշներում հայտնաբերված բակտերիաները նման են այն բակտերիաներին, որոնք կան շների արտաթորանքում: Դրանք կարող են առաջացնել ալերգիա, ասթմա և այլն:

Բակտերիաները կարող են օդում հայտնվել քամու, փոշու, հողի միջոցով, բայց փաստը, որ նման բակտերիաներ հայտնաբերվել են նաև ձմռանը, խոսում է այն մասին, որ տնային կենդանիներն են մեղավոր օդի աղտոտման համար: