Ճանապարհային ոստիկանությունում արշալույսները խաղաղ չեն

Վերջերս կոռուպցիայի դեմ հայտարարված պայքարի շրջանակներում վարչապետ Տիգրան Սարգսյանը հայտարարեց վարորդական իրավունքների տրամադրման կարգում փոփոխություններ կատարելու մասին, որոնք զգալիորեն հեշտացրին եւ պարզեցրին դրանք ստանալու գործընթացը:

Սակայն, ինչպես բազմաթիվ այլ ոլորտներում, այնպես էլ այստեղ նման նախաձեռնությունները տալիս են հակառակ արդյունքը: Ճանապարհային ոստիկանությունում պրպտել եւ գտել են փող աշխատելու նոր միջոց, որը, սակայն, ճակատագրական  եղավ համակարգի որոշ աշխատակիցների համար:

Yerkir.am-ի տեղեկություններով` ոստիկանության կազմակերպված հանցավորության դեմ պայքարի 6-րդ վարչության կողմից բացահայտվել և ոստիկանության քննչական վարչության քննությանն են հանձնվել կեղծ վարորդական իրավունքների պատրաստման և տրամադրման փաստեր, որոնց հիման վրա, ամենայն հավանականությամբ, մոտ օրերս կհարուցվի քրեական գործ: 

Ինչպես մեզ հայտնեցին լավատեղյակ աղբյուրները, քրեական գործ է հարուցվելու նաև Հայաստանի ոստիկանության Ճանապարհային ոստիկանության 2-րդ սպայական գումարտակի հրամանատար, գնդապետ Ստեփան Կարախանյանի նկատմամբ` պաշտոնեական լիազորությունների չարաշահման, առանձնապես խոշոր չափերի հասնող յուրացումների փաստով: Խոսքը մոտ 58 մլն դրամ արժողությամբ բենզինի յուրացման մասին է: