ԿԽՄԿ Ստեփանակերտի գրասենյակի նոր ղեկավարը՝ ԱԳՆ-ում

Այսօր ԼՂՀ արտգործնախարարի պաշտոնակատար Վասիլի Աթաջանյանն ընդունել է Պամելա Ստատակիսին` Կարմիր խաչի միջազգային կոմիտեի (ԿԽՄԿ) Ստեփանակերտի գրասենյակի ղեկավարի պաշտոնում նրա լիազորությունների ժամկետը լրանալու կապակցությամբ, եւ գրասենյակի նորանշանակ ղեկավար Ռոման Պարամոնովին:

Ինչպես հայտնում են ԼՂՀ արտաքին գործերի նախարարության մամուլի ծառայությունից, Վասիլի Աթաջանյանը երախտագիտություն է հայտնել Պամելա Ստատակիսին արդյունավետ աշխատանքի համար եւ հույս հայտնել, որ ԿԽՄԿ Ստեփանակերտի գրասենյակի նոր ղեկավարությանը կհաջողվի իրականացնել նախատեսված բոլոր ծրագրերը:

Տեղի է ունեցել կարծիքների փոխանակում երկուստեք հետաքրքրություն ներկայացնող հարցերի շուրջ: Ռոման Պարամոնովը պատմել է գրասենյակի ապագա ծրագրերի մասին` նշելով, որ ԿԽՄԿ-ն շարունակելու է ԼՂՀ-ում մարդասիրական ծրագրերի իրականացումը:

Վասիլի Աթաջանյանը հանրապետության իշխանությունների անունից պատրաստակամություն է հայտնել ամեն կերպ աջակցել Լեռնային Ղարաբաղում ԿԽՄԿ գործունեությանը: