ՀՀ փոխվարչապետը մեկնեց Չինաստան

ՀՀ փոխվարչապետ, տարածքային կառավարման նախարար Արմեն Գեւորգյանի գլխավորած պատվիրակությունը չինական կողմի հրավերով այսօր աշխատանքային այցով մեկնել է Չինաստանի Ժողովրդական Հանրապետություն:

Պատվիրակությունն այցը կսկսի Գուանդուն նահանգից, որտեղ Շենժեն քաղաքում կմասնակցի ուսանողական մարզական համաշխարհային 26-րդ խաղերի փակման արարողությանը: Խաղերը մեկնարկել են օգոստոսի 12-ին, որին մասնակցող հայաստանցի մարզիկները հանդես են եկել 5 մարզաձեւում` շախմատ, ծանրամարտ, թեքվոնդո, ձյուդո, թենիս: Ծանրամարտիկ Աղասի Աղասյանը նվաճել է ոսկե մեդալ` դառնալով այս խաղերում ոսկեմեդալակիր առաջին հայ մարզիկը:

Նախատեսվում են նաեւ փոխվարչապետի հանդիպումները նահանգային ղեկավարության հետ:

Գուանդունից պատվիրակությունը կմեկնի Պեկին, որտեղ ՀՀ փոխվարչապետը հանդիպումներ կունենա ՉԺՀ բարձրաստիճան պաշտոնյաների հետ. տեղեկացնում է ՏԿՆ հասարակայնության հետ կապերի բաժինը: