Սպիտակում կկառուցվի հելիոսարքավորումների գործարան

Միխայիլ Գորբաչովի ղեկավարած «Կանաչ խաչ» հիմնադրամը գումարներ կհատկացնի Հայաստանի Սպիտակ քաղաքում հելիոսարքավորումների (արեւից էներգիա ստացող) գործարան կառուցելու համար:

Ինչպես լրագրողներին այսօր հայտնել է տեխնիկական գիտությունների դոկտոր, հելիոֆիկացիայի ծրագրերի ղեկավար Վահան Համազասպյանը ծրագիրը Հայաստանին կօգնի հաղթահարել տնտեսական ճգնաժամը, քանի որ նմանատիպ սարքավորումներ աշխարհի ոչ մի երկրում չեն արտադրվում, իսկ պահանջարկը հսկայական է:

«Հայաստանի կառավարությունից առայժմ ոչ մի օգնություն չենք ստանում: Օրինակ` Արթուր Բաղդասարյանի ղեկավարած Անվտանգության խորհուրդը վերջերս հաստատել է էներգետիկ անվտանգության մասին ռազմավարական ծրագիրը, որում խոսք անգամ չկա հելիոսարքավորումների արտադրության մասին»,- բողոքել է գիտնականը:

Նախնական ներդրման չափը 8 մլն դոլար է: Գործարանը կառուցվելու է Սպիտակի վերելակաշինական նախկին գործարանի շենքի հիման վրա:

Վ. Համազասպյանը նաեւ նշել է, որ գործարանը օրական կարտադրի տարբեր հզորության (3-32 կՎտ)  1000 սարք: 32 կՎտ հզորությամբ սարքը բավարար է գյուղացիական մեկ տնտեսությունն ամբողջովին էլեկտրիֆիկացնելու համար:

Ներկայումս բանակցություններ են տարվում Մոզամբիկի եւ Բրազիլիայի հետ` այդ սարքավորումների արտահանումը կազմակերպելու համար: