11-ամյա տղան դատի է տվել մորը

11-ամյա գերմանացի տղան զանգահարել է ոստիկանություն` ասելով, որ մայրն իրեն «հարկադիր աշխատանքի է ենթարկում»: Սակայն հետագայում պարզվել է, որ մայրն ընդամենը խնդրել է տղային օգնել հավաքել տունը. տեղեկացնում է BBC-ն:

«Օրվա մեջ ընդհանրապես ազատ ժամանակ չեմ ունենում, քանի որ մայրս ստիպում է աշխատել ամբողջ օրը»,- ոստիկաններին բողոքել է տղան:

Իսկ երբ ոստիկանը խնդրել է տղային պատմել, թե հատկապես ինչ հարկադիր աշխատանք է կատարում, տղան պատասխանել է, որ ինքը ստիպված է լինում մաքրել տունն ու պատշգամբը: Երբ ոստիկանը հարցրել է, թե արդյոք տղան պատկերացում ունի՞, թե ինչ ասել է հարկադիր աշխատանք, վերջինս պատասխանել է, որ ինքը շատ լավ էլ հասկանում է, թե ինչ է սահմանում տվյալ բառը:

Այնուհետեւ ոստիկանը խնդրել է խոսափողը փոխանցել մորը, որն էլ հավաստիացրել է, որ որդին ոստիկանություն է զանգահարել, երբ ինքը խնդրել է հատակին թափված թղթերը հավաքել: «Նա ամբողջ օրը խաղում է, եւ երբ նրան ասում եմ, որ գոնե հավաքի այն, ինչ թափել է, նա սկսում է բողոքել, որ իրեն հարկադիր աշխատանքի եմ ենթարկում»,- ասել է տղայի մայրը: