Ճապոնիան երդվում է այլեւս երբեք չպատերազմել

Ճապոնիայի վարչապետ Նաոտո Կանն այսօր` 1945-ին Ճապոնիայի կապիտուլյացիայի 66-րդ տարելիցին նվիրված համազգային արարողության ժամանակ, հայտարարել է, որ իր կառավարությունն ամեն ջանք կգործադրի խաղաղության ամրապնդման ուղղությամբ եւ այլեւս երբեք չի կրկնի Երկրորդ համաշխարհային պատերազմի ողբերգությունը: Նա նաեւ նշել է, որ իրենք խորապես զղջում են այն տառապանքների համար, որ Տոկիոն պատճառել է այլ ժողովուրդների:

Արարողությանը մասնակցել է մոտ 6 հազար մարդ, այդ թվում` երկրի կայսրն ու կայսրուհին, պատգամավորներ, զոհվածների հարազատներ:

«Մեր երկիրն այսօր դարձյալ երդվում է այլեւս երբեք չպատերազմել, երդվում է ջանք չխնայել աշխարհում խաղաղության ամրապնդման համար»,- ասել է վարչապետը:

Պաշտոնական տվյալներով` Երկրորդ համաշխարհային պատերազմի ժամանակ զոհվել է 3,1 մլն ճապոնացի, այդ թվում` ամերիկյան ատոմային ռմբակոծությունների ենթարկված Նագասակի եւ Հիրոսիմա քաղաքների բնակիչները: