Առեւանգված էստոնացիներն ազատ են արձակվել

Մոտ 4 ամիս առաջ Լիբանանում առեւանգված էստոնացի զբոսաշրջիկներն ազատ են արձակվել: Այսօր առավոտյան այդ մասին տեղեկացրել է France Presse-ը` վկայակոչելով Լիբանանի ԱԳՆ աղբյուր:

«Ներկայումս նրանք գտնվում են Արսալ քաղաքում (Բեքաա հովիտ) եւ իրենց լավ են զգում»,- պատմել է աղբյուրը` հավելելով, որ 7 էստոնացին էլ մոտ ժամանակներս Բեյրութ կտեղափոխվեն:

Այլ մանրամասներ դեռ չեն հաղորդվում:

Հիշեցնենք, որ Էստոնիայի 7 քաղաքացիները առեւանգվել էին մարտի 23-ին Արեւելյան Լիբանանի Զահլե քաղաքի մոտակայքից: Ավելի ուշ իրենց «Հանուն արաբական բարեփոխումների եւ վերածննդի շարժում» անվանող խմբավորումը փրկագին էր պահանջել նրանց համար: Ապրիլի 20-ին եւ մայիսի 20-ին ինտերնետում տեսանյութեր էին զետեղվել, որոնցում էստոնացիները խնդրում էին օգնել իրենց: Վերջին տեսագրությունը զետեղվել էր հուլիսի 8-ին: