Հատուկ գործակալ Վլադիմիր Պուտինը կպարգեւատրի

Մոսկվայի կենտրոնում անհայտ անձինք տեղադրել են հատուկ գործակալ Վլադիմիր Պուտինի մասին «ՎՎ-ն կծածկի» գոյություն չունեցող ֆիլմի աֆիշները:

Հասարակական տրանսպորտի կանգառներում եւ գովազդային վահանակներից մոսկվացիներին է նայում ատրճականով զինված, երկրի վարչապետին շատ հիշեցնող մեկը:

Աֆիշները փակցված են Կարմիր հրապարակում, Պետդումայի դիմաց, Տվերսկոյ եւ այլ կենտրոնական փողոցներում:

Պաստառներին գրված է. «Xquest.ru presents Vladimir Putin. հուլիսի 15-ից բոլոր կինոթատրոններում»:

Ինչպես տեղեկացնում է mignews.com-ը, վկայակոչելով բլոգերների ridus-news ընկերակցությունը, Xquest-ը գաղտնի պետական նախագիծ է` քողարկված համառուսական Xquest խաղի տակ:

«Xquest-ն ընտրում է տաղանդավոր եւ հեռանկարային զինվորներ «Պրոյեկտ X»-ի պաշտպանության համար: Մասնակցությունը նախագծին երաշխավորում է անմոռանալի տպավորություններ, դրայվ եւ ադրենալին: Նախագծի լավագույն գործակալները պարգեւատրվելու են արժեքավոր մրցանակներով»,- ասվում է ridus-news-ում:

Մրցանակային ֆոնդում մեկ ավտոմեքենա է, 10 iPhone, 20 iPad, 30 նեթբուք, 40 լուսանկրչական ապարատ եւ այլն: