ՀԱՅԱՑՔ. Սահմանամերձ գյուղերը դատարկվում են

Թերթի ստույգ տեղեկություններով` միջին հաշվով շաբաթը 60-65 ընտանիք է հեռանում Բագրատաշենի մաքսակետով: Հատկապես մեծ արագությամբ դատարկվում են Տավուշի մարզի Նոյեմբերյանի ենթաշրջանի գյուղերը:

Իսկ օրերս ավտոբուսները մտան սահմանամերձ գյուղերից մեկը, եւ... կազմակերպված ձեւով մի գիշերվա մեջ հեռացավ 21 ընտանիք:

Գյուղերն են դատարկվում: Այն էլ` սահմանամերձ: Այն գյուղերը, որոնք Ղարաբաղյան կռվի թեժ թատերաբեմ էին: Կենաց-մահու կռիվ տալով` գյուղացիները պահեցին-պահպանեցին իրենց բնակավայրերը: Ոչ միայն տեղաբնակները. ծննդավայրից հեռացած համերկրացիներից շատերը վերադառնում ու կռվում էին հարազատ գյուղի համար: Որը զենք էր վերցնում, որը փողով էր օգնում, որը մթերք էր հասցնում կռվողներին, որը զինամթերք էր հայթայթում-ուղարկում: