Թունիսի նախկին նախագահին դատապարտել են 35 տարի ազատազրկման

Թունիսի նախկին նախագահ Զին ալ Աբիդին բեն Ալին եւ նրա կինը դատապարտվել են 35 տարի ազատազրկման պետական միջոցների յուրացման համար: Դատավճիռը կայացվել է հեռակա կարգով, քանի որ մեղադրյալները ապաստան են գտել Սաուդյան Արաբիայում:

Մեղադրող կողմի հիմնական ապացույցը վերջերս բեն Ալիի առանձնատներից մեկում հայտնաբերված թաքստոցն է` ոսկով, զարդերով եւ խոշոր գումարներով:

Դատավորի որոշմամբ` նախկին նախագահը նաեւ 50 մլն դինարի (36,2 մլն դոլար) տուգանք պետք է վճարի, իսկ նրա կինը` 41 մլն դինարի:

Նրանց դեմ դատավարությունը կվերսկսվի հունիսի 30-ին. այս անգամ կքննարկվեն ապօրինի զենք, թմրանյութեր եւ հնագիտական իրեր պահելու հարցերը:

Ընդհանուր առմամբ, 74-ամյա բեն Ալիի դեմ ներկայացվել են 93 կետից բաղկացած մեղադրանքներ: