Պատրիարք Կիրիլը դեմ է ԱՄՆ-ի հեգեմոնիային

Համայն Ռուսիո պատրիարք Կիրիլը հավանություն է տալիս բազմաբեւեռ աշխարհի գաղափարին եւ կոչ է անում, որ Ռուսաստանը դառնա այդ բեւեռներից մեկը:

«Բազմաբեւեռության թեմայով խոսում են քաղաքական գործիչները, տնտեսագետները: Բոլորը հասկանում են, որ միաբեւեռ աշխարհը, որտեղ քաղաքական, տնտեսական որոշումները կայացվում են մեկ կենտրոնում, վտանգավոր կլինի երկրագնդի, բոլոր երկրների համար»,- ասել է պատրիարքը ` ելույթ ունենալով Խաղաղության ռուսական հիմնադրամի 50-ամյակին նվիրված միջոցառմանը, որի ընթացքում նա պարգեւատրվել է այդ միջազգային կազմակերպության ոսկե մեդալով:

Ըստ հոգեւոր առաջնորդի` միաբեւեռ աշխարհը, հիմնված մեկ քաղաքական կենտրոնի հեգեմոնիայի վրա, անկենսունակ է: Նրա խոսքերով` բոլորին լավ հայտնի է, թե ինչի հանգեցրեց մի կենտրոնի հեգեմոնիան: «Բավական է հիշել ողբերգական իրավիճակը Կոսովոյում, Հարավսլավիայում եւ աշխարհի այլ կետերում»,- պարզաբանել է պատրիարքը: