Պատժել ու նվաստացնել Անգելա Մերկելին

Իրանի կառավարությունը թույլ չի տվել, որ Գերմանիայի կանցլեր Անգելա Մերկելի ինքնաթիռն անցնի իր օդային տարածքով:

Կանցլերը Թուրքիայից պաշտոնական այցով մեկնում էր Հնդկաստան: Ինքնաթիռը մի քանի ժամ պտույտ է գործել Թուրքիայի օդային տարածքում: Ի վերջո, թույլտվություն է ստացվել, երբ օդաչուներն արդեն մտադրություն են ունեցել վայրէջք կատարել Թուրքիայում` երկյուղելով, որ վառելիքը չի բավականացնի հետագա թռիչքի համար:

Die Welt թերթին տված հարցազրույցում Մերկելն ասել է. «Ո'չ ես, ո'չ էլ օդաչուները մեր կյանքում նման բան դեռեւս չէինք տեսել»:

Գերմանական մամուլը նշում է, որ Իրանն այդկերպ փորձել է պատժել ու նվաստացնել կանցլերին այն բանի համար, որ Գերմանիան մասնակցել է Իրանի միջուկային ծրագրի պատճառով կիրառված պատժամիջոցներին: Թերթերը գրում են, որ նույն ժամերին, երբ Մերկելի ինքնաթիռը պտույտ էր գործում Թուրքիայի վրա, մեկ այլ գերմանական կառավարական ինքնաթիռ անարգել անցել է Իրանի օդային տարածքով: