Հայաստանի նախագահն ընդունել է Վրաստանի պաշտպանության նախարարին

Հայաստանի նախագահ Սերժ Սարգսյանն այսօր ընդունել է պաշտոնական այցով Հայաստան ժամանած Վրաստանի պաշտպանության նախարար Բաչո Ախալայային. տեղեկացնում է ՀՀ նախագահի մամուլի գրասենյակը:

Նախագահը կարևորել է երկու երկրների միջև ակտիվ շփումներն ու բարձր մակարդակի փոխայցելությունները, այդ թվում` մի քանի ամիս առաջ Վրաստանի նախագահի, վարչապետի և այլ բարձրաստիճան անձանց այցելությունները Հայաստան, որոնց ընթացքում քննարկվել են հայ-վրացական հարաբերությունների զարգացմանն ու համագործակցության ընդլայնմանն առնչվող հարցերի լայն շրջանակ:

Սերժ Սարգսյանն ընդգծել է, որ Հայաստանը շահագրգիռ է խաղաղ ու կայուն տեսնել հարևան Վրաստանը, իսկ բարեկամ վրաց ժողովրդին` բարեկեցիկ պայմաններում իր ապագան կառուցելիս:

Վրաստանի պաշտպանության նախարարը, նշելով, որ սա իր առաջին պաշտոնական այցն է Հայաստան, հայ գործընկերոջ հետ ունեցած հանդիպումն ու քննարկումները համարել է արդյունավետ: