Ազատության հրապարակն ականապատված չէ

Այսօր տեղի ունենալիք ՀԱԿ-ի հանրահավաքը կլինի հերթականներից մեկը` ոչ այնքան մարդաշատ եւ առանց շրջադարձային քայլերի. այսօր լրագրողների հետ հանդիպման ժամանակ ասաց ՀՀԿ-ական պատգամավոր Գագիկ Մելիքյանը:

Հարցին, թե չի՞ սպասվում, որ հանրահավաքի մասնակիցները նորից կնվաճեն Ազատության հրապարակը, Գ. Մելիքյանը պատասխանեց, որ հրապարակ մտնել-չմտնելը լուրջ փոփոխությունների չի կարող հանգեցնել:

Եվ, առհասարակ, անհասկանալի է, թե ի՞նչ նվաճման մասին է խոսքը. «Ո՞վ է ծանր հրետանի դրած պաշտպանում Ազատության հրապարկը, փշալարեր տեսե՞լ եք կամ ականապատված տարածքներ, նվաճելս ո՞րն է: Հանրապետության մայրաքաղաքի կենտրոնում ինչ-որ մեկը հրապարակ պիտի նվաճի, եւ երեւի «Ազգային հերոս» էլ պիտի տանք այնտեղ մտնողին»:

Գ. Մելիքյանը հավելեց, որ Ազատության հրապարակ ժողովուրդն անարգել մտնում է, դուրս էլ է գալիս, եթե անօրինական քայլեր չի կատարում: