Ջրասույզ եղած ինքնաթիռը գտնվել է

Ստորջրյա որոնումների արդյունքում հայտնաբերվել է Air France ավիաընկերության` Ատլանտյան օվկիանոսում 2009-ին վթարի հետեւանքով ջրասույզ եղած ինքնաթիռը:

Ֆրանսիացի հետաքննողների կարծիքով` դա հույս է ներշնչում, որ իրենց, ի վերջո, կհաջողվի պարզել, թե ո՞րն է օդանավի կործանման պատճառը:

Ի դեպ, նախորդ լայնածավալ ու թանկարժեք որոնումները արդյունք չէին տվել:

Ավիացիոն վթարները հետաքննող ֆրանսիական գործակալության հայտարարության համաձայն` որոնողական աշխատանքներով զբաղվող թիմը վերջին 24 ժամվա ընթացքում հայտնաբերել է ինքնաթիռի բազմաթիվ բեկորներ:

Հիշեցնենք, որ փարիզյան դատարանը մարտի 18-ին չկանխամտածված սպանության նախնական մեղադրանք էր ներկայացրել Airbus կորպորացիային A330 ինքնաթիռի վթարի կապակցությամբ, որի հետեւանքով 228 մարդ էր զոհվել: Դատարան էին կանչվել նաեւ Air France ավիաընկերության ներկայացուցիչները: