Կրթության նախարարության աշխատանքը բավարար է գնահատվել

Այսօր, ԼՂՀ վարչապետ Արա Հարությունյանի մասնակցությամբ, հրավիրվել է ԼՂՀ կրթության եւ գիտության նախարարության կոլեգիայի նիստ, որի ընթացքում ներկայացվել են 2010 թ. ԿԳ ոլորտում կատարված աշխատանքները:

Նշվել է, որ կշարունակվեն արհեստագործական կրթության կայուն ցանցի ստեղծմանն ուղղված ծրագրերը, որպեսզի թողարկվեն բարձրակարգ արհեստավորներ: Հանրապետությունում արհեստագործական դպրոցների թիվն առաջիկայում մեկով կավելանա. նախատեսվում է Շուշիում կառուցել եվրոպական չափանիշներին համապատասխան նոր արհեստագործական կրթարան:

Ինչպես հայտնում են կառավարության տեղեկատվության եւ հասարակայնության հետ կապերի վարչությունից, նախարարության մեկ տարվա կատարած աշխատանքները ներկաները գնահատել են բավարար: Ըստ վարչապետի, սակայն, գոհացուցիչ արդյունքների հասնելու համար անհրաժեշտ է հետեւողական աշխատանք:

Նրա համոզմամբ` հանրակրթական ուսումնական հաստատությունների տնօրենները պետք է իրազեկ լինեն երկրի սոցիալ-տնտեսական զարգացման ծրագրերին, քանի որ դպրոցականների շրջանում դրանց դերը մեծ է, հատկապես` ճիշտ մասնագիտություններ ընտրելու հարցում:

«Սխալ կողմնորոշումը հանգեցնում է ոչ պահանջված մասնագետների կուտակման, ինչը ներկայումս առկա է մեզ մոտ»,- նշել է Արա Հարությունյանը:

Կրթության եւ գիտության նախարար Վլադիկ Խաչատրյանի տեղեկացմամբ՝ գալիք ուսումնական տարում կմեկնարկի «Յուրաքանչյուր աշակերտին` մեկ համակարգիչ» ծրագիրը, որի առաջին փուլով համակարգիչներ կբաժանվեն տարրական դասարանների աշակերտներին: