"Ֆուկուսիմա"-ում վիճակը կկայունանա՞

Ճապոնիայի վարչապետ Նաոտո Կանը հայտարարել է, որ դեռեւս պարզ չէ, թե երբ  կկայունանա իրավիճակը «Ֆուկուսիմա-1» ատոմակայանում, սակայն հաստատ է, որ դեռեւս TEPCO ընկերությանը պատկանող այս ատոմակայանը չի սեփականաշնորհվի պետության կողմից:

«Ատոմակայանում իրավիճակը դեռեւս չի կայունանում, սակայն հեռավոր ապագայում մենք պարտավոր ենք ապահովել անվտանգությունը: Թեեւ դեռեւս դժվար է ասել, թե երբ  կավարտվի ճգնաժամը»,- ասել է վարչապետը:

Ինչպես գրում է Gazeta.ru-ն, Կանը նշել է նաեւ, որ ճգնաժամում գտնվող ընկերությանը հարկավոր է օգնություն ցույց տալ, սակայն դեռեւս նախընտրելի են համարում, որ այն շարունակի մասնավոր լինել:

Ճապոնիայից իրարամերժ տեղեկություններ են հաղորդվում վթարի ենթարկված ատոմակայանի վերաբերյալ, մի բան ակնհայտ է, որ վտանգավոր իրավիճակի կարգավորման հարցը երկարաձգվում է:

Չորեքշաբթի օրը հաղորդվել էր, թե TEPCO-ի ղեկավար Մասատակի Շիմիձուն ինքնասպան է եղել, սակայն հենց նույն օրը  լուրը հերքվեց եւ պաշտոնապես հայտարարվեց, թե նա հիվանդանոցում է:

Ճապոնիայի ղեկավարությունն ինքնուրույն չի կարողանում չեզոքացնել վթարի հետեւանքները, այս մասին է վկայում նրա` ԱՄՆ-ից եւ Ֆրանսիայից օգնություն խնդրելու փաստը: Կիրակի օրը պատրաստվում են Ճապոնիա մեկնել ամերիկացի փորձագետները: