Վերահաստատում եմ հայերի ինքնորոշման անքակտելի իրավունքը. Ռընե Ռուքեն

Ֆրանսիայի ԱԺ պատգամավոր, Ալֆորվիլ քաղաքի քաղաքապետ Ռընե Ռուքեն տեղական թերթում «Ժողովուրդների գարուն» վերնագրով հոդված է հրապարակել, որում իր աջակցությունն է հայտնել ժողովուրդների ինքնորոշման իրավունքին. տեղեկացնում է Ֆրանսիայում ԼՂՀ մշտական ներկայացուցչությունը:

«Արաբական ժողովուրդների` իրենց ազատության համար մղած պայքարի` վերջին շաբաթների իրադարձությունները թույլ են տալիս բազմաթիվ դասեր քաղել: Դա շարժում է` հանուն ազատության, որի ճակատագիրը որոշվում է հենց մեր աչքերի առաջ եւ հիշեցնում է ժողովուրդների ձգտումները հասկանալու եւ  հարգելու անհրաժեշտության մասին, քանի որ ժողովրդավարության ձգտումը համամարդկային արժեք է աշխարհի բոլոր ծայրերում:

Այս կապակցությամբ թույլ տվեք հիշեցնել աշխարհի մեկ այլ տարածաշրջանում` Լեռնային Ղարաբաղում ապրող հայերի մասին, ովքեր խիզախորեն պայքարում են Ադրբեջանի դեմ, որը փորձում է բռնի կերպով ճնշել մեզ բարեկամ այս ժողովրդի` հարազատ հողում, սեփական հանրապետության մեջ ազատ ապրելու կամքը: Այսօր` անպատիժ մնացած Հայոց ցեղասպանությունից 95 տարի անց, ավելի քան երբեւէ ես վերահաստատում եմ հայերի ինքնորոշման անքակտելի իրավունքը»,- նշվում է ֆրանսիացի պատգամավորի հոդվածում:

Նա կոչ է արել իր երկրին եւ ֆրանսիական դիվանագիտությանը հարգել «տեւական խաղաղության ձգտող եւ դրան հասնելու համար հերոսաբար պայքարող ժողովուրդներին»: