Ֆեդերերը չէր էլ պատկերացնում

Աշխարհի երկրորդ ուժեղագույն թենիսիստ, շվեյցարացի Ռոջեր Ֆեդերերը կարծում է, որ վարկանիշային աղյուսակի առաջին հնգյակը վերջին ժամանակներում խաղում է բարձր մակարդակով, իսկ տղամարդկանց վարկանիշային աղյուսակի երկրորդ համարը՝ սերբ Նովակ Ջոկովիչը, ցուցադրում է հիանալի խաղ։

«Ես շարունակում եմ պնդել, որ վերջին 6 ամիսների ընթացքում ես լավ եմ խաղում: Ուղղակի Նովակը տվյալ պահին խաղում է ավելի լավ, քան մնացած բոլորը։ Բայց դա սպորտի մի մասն է։ Անկեղծ ասած` ես երբեք էլ չեմ մտածել, որ 15 տարվա ընթացքում կլինեմ առաջատարի դերում։ Ես գիտեի, որ դա անհնար է։ Այժմ, ովքեր գտնվում են վարկանիշային աղյուսակի առաջին հնգյակում, խաղում են շատ լավ` Ռաֆայել Նադալը, ես, Էնդի Մարեյը, ով խաղում էր Australian Open-ի եզրափակիչում, և նույնիսկ Ռոբին Սոդերլինգը, սակայն տվյալ պահին նա չի գտնվում իր լավագույն մարզավիճակում...», - Ֆեդերերին մեջբերում է Tenisweb-ը։

Իր առաջին հանդիպումն այս օրերին Մայամիում ընթացող Sony Ericsson Open-2011-ում «Մեծ սաղավարտի» բազմակի հաղթողը կսկսի երկրորդ փուլից, որտեղ ուժերը կչափի Չեխիայի ներկայացուցիչ Ռադեկ Շտեպանեկի հետ։