ԵԱՀԿ գործող նախագահին հրավիրում են Արցախ

Արցախի երիտասարդական եւ երիտասարդության հետ աշխատող շուրջ մեկ տասնյակ կազմակերպություններ, ողջունելով ԵԱՀԿ գործող նախագահ, Լիտվայի ԱԳ նախարար Անդրոնիուս Աժուբալիսի` փետրվարի սկզբին արած հայտարարությունը, որ «Ղարաբաղյան հակամարտությունը դժվար լուծելի է, քանզի այնտեղ արդեն նոր սերունդ է մեծացել», կոչ են արել  գործող նախագահին` այցելել Արցախ եւ տեղում լսել նոր սերնդի ձայնը:

Համապատասխան նամակն այսօր կհանձնվի ՀՀ-ում Լիտվայի դեսպանատուն եւ ԵԱՀԿ գրասենյակ:

Նամակում, մասնավորապես, նշվում է. «Մենք` Ղարաբաղի քաղաքացիական հասարակության ներքոնշյալ ներկայացուցիչները, գրում ենք` հայտնելու մեր բարձր գնահատականը ձեր` վերջերս Ղարաբաղի նոր սերնդի մասին արված հայտարարությանը: Մենք ցանկանում ենք հրավիրել ձեզ Ղարաբաղ այս նոր սերնդի ձայնը լսելու, ինչի կարիքը դուք բացահայտորեն նշեցիք:

Մենք գիտենք, որ ԵԱՀԿ անդամ երկրները հանձն են առել, համագործակցելով ՄԱԿ-ի հետ, հասնել մարդու իրավունքների եւ հիմնարար ազատությունների համաշխարհային ճանաչման, որը ամրագրված է Մարդու իրավունքների համընդհանուր հռչակագրում: Մեր ապրելու, ազատության եւ անձնական անվտանգության իրավունքները դեռեւս սպառնալիքի ներքո են: Ցայսօր մենք ապրում ենք առանց մեր հիմնարար իրավունքների ճանաչման:

Միաժամանակ, անդամ երկրները ՄԱԿ-ի կանոնադրությամբ պատասխանատվություն են վերցրել տարբերություն չդնել երկրի կամ տարածքի քաղաքական, իրավական կամ միջազգային կարգավիճակի միջեւ` անկախ նրանից, թե այն անկախ է, վստահելի, ոչ ինքնակառավարվող, կամ ինքնիշխանության սահմանափակում ունի՞, թե՞ ոչ:  Վերոնշյալը նրանք հանձն են առել մարդու իրավունքների եւ  հիմնարար ազատությունների առաջխաղացման եւ ապահովման գործում:

Մենք Ղարաբաղում ընդունել ենք Ժիրի Դիենստբիերին` Չեխիայի արտաքին գործերի նախարար, Ադրիան Սեւերինին` ԵԱՀԿ Խորհրդարանական վեհաժողովի նախագահ, Անդրեյ Կոզարևին և Եվգենի Պրիմակովին` Ռուսաստանի արտաքին գործերի նախարարներ, Բորիս Ելցինին` Ռուսաստանի նախագահ, Նուրսուլթան Նազարբաևին` Ղազախստանի նախագահ:

Հաշվի առնելով այդ ամենը` մեծ պատիվ կլինի աշխատել ձեր գրասենյակի հետ, զարգացնելու անհրաժեշտ հնարավորություն Ղարաբաղի նոր սերնդի համար` արտահայտելու մեր հույսերը, երազանքներն ու ցանկությունները նրանց, ովքեր պարտավորվել են ազդեցություն ունենալ մեր ճակատագրի որոշման վրա»: