Ադրբեջանի անպատասխանատվության պատճառով աճում է զոհերի թիվը

Մարտի 10-ին ՀՀ պաշտպանության նախարար Սեյրան Օհանյանի եւ ԵՄ արտաքին գործողությունների ծառայության Եվրոպայի և Կենտրոնական Ասիայի համար պատասխանատու ստորաբաժանման կառավարիչ-տնօրեն Միրոսլավ Լայչակի ու տնօրեն Գունար Վիգանդի` Բրյուսելում կայացած հանդիպման ընթացքում քննարկվել են տարածաշրջանային անվտանգությանը և Լեռնային Ղարաբաղի հակամարտության խաղաղ կարգավորմանը վերաբերող հարցեր:

Սեյրան Օհանյանն անթույլատրելի է համարել մարտի 5–ին Հայաստանի և Ադրբեջանի նախագահների միջև ձեռք բերված պայմանավորվածություններից հետո շփման գծում Ադրբեջանի կողմից վարվող դիպուկահար և անկանոն կրակը: Նախարարը նշել է, որ Ադրբեջանի անպատասխանատու հայտարարությունների և շահարկումների արդյունքում հրահրված միջադեպերի պատճառով աճում է զոհերի թիվը:

Եվրամիության պաշտոնյաները չափազանց կարևորել են Լեռնային Ղարաբաղի հակամարտության խաղաղ կարգավորումը, պատրաստակամություն հայտնել գործնական աջակցություն ցուցաբերել փոխվստահության մթնոլորտի բարելավման ուղղությամբ. տեղեկացնում է ՀՀ ՊՆ մամուլի ծառայությունը: