ԿԱՊԻՏԱԼ. Իրաքում 40 մլրդ դոլար է անհետացել

Իրաքի խորհրդարանը 40 մլրդ դոլարի կորուստ է հայտնաբերել Իրաքի զարգացման հիմնադրամում (Development Fund for Iraq, DFI), որը կազմավորվել է Սադամ Հուսեյնի վարչակարգի տապալումից հետո։

Իրաքի իշխանությունները հստակ չեն մեկնաբանում, թե որտեղ և ինչպես է անհետացել այդ գումարը։ «Գումարներն անհետացել են, և մենք չգիտենք՝ ինչպես։ Ընդհանուր առմամբ, անհետացել է 40 մլրդ դոլար։ Հնարավոր է՝ այն ինչ-որ բանի վրա է ծախսվել, բայց դրանք չեն գրանցվել մեր հաշիվներում։ Խորհրդարանն այս հարցով հետաքննություն է վարում»,- հայտարարել է խորհրդարանի խոսնակ Ուսամա ալ Նաջաֆին։

Նա չի պարզաբանել նաև, թե երբ և ինչ հանգամանքներում է բացահայտվել կորուստը:

Ֆրանսիական AFP-ի հաղորդմամբ` հետաքննությամբ կզբաղվեն միանգամից երկու խորհրդարանական հանձնաժողովներ:

Հիշեցնենք, որ DFI-ը ծառայում է նավթի վաճառքից, ինչպես նաև պետության այլ եկամուտներից ստացված միջոցների կուտակմանը։