223 երիտասարդ ընտանիք բնակարան է ձեռք բերել

223 երիտասարդ ընտանիք նախորդ տարվա ընթացքում բնակարան է ձեռք բերել «Երիտասարդ ընտանիքին մատչելի բնակարան» պետական նպատակային ծրագրի շրջանակներում: Այս բնակարանների գնման համար բանկերից եւ վարկային կազմակերպություններից տրվել է, ընդհանուր առմամբ, 1.8 միլիարդ դրամ:

«Բնակարան երիտասարդներին» ունիվերսալ վարկային կազմակերպության այս տվյալներն այսօր լրագրողների հետ հանդիպման ժամանակ ներկայացրեց սպորտի եւ երիտասարդության հարցերի նախարարության վարչության պետ Արսեն Սողոմոնյանը:

223 հիփոթեքային վարկերի 147-ը տրամադրվել են Երեւանում` 1.4 միլիարդ դրամ արժողությամբ, 76-ը` մարզերում` 0.4 միլիարդ դրամ:

Ծրագիրը սահմանում է, որ գնվող բնակարանի գինը չի կարող գերազանցել 16 միլիոն դրամը (մոտավորապես` 43-44 հազար դոլար): Հարցին, թե հիմնականում ի՞նչ գնի սահմաններում են եղել գնված բնակարանները, Ա. Սողոմոնյանը պատասխանեց. «Երեւան քաղաքում հիմնականում հենց 16 միլիոնի սահմաններում, իսկ մարզերում, դատելով քանակից եւ գումարի չափից, կարելի է եզրակացնել, որ ավելի ցածր արժեքով են ձեռք բերվել բնակարանները: Իսկ թե ո՞ր շահառուի կողմից որքա՞ն գումարով է գնվել, դա արդեն բանկային գաղտնիք է»:

Ա. Սողոմոնյանը նշեց նաեւ, որ նոյեմբերին կառավարության որոշմամբ ծրագրի պայմանների բարելավմանն ուղղված փոփոխություններ են կատարվել մարզերում բնակարաններ գնելու դեպքում: Կանխավճարը սահմանվել է 10 տոկոս, իսկ ամսական տոկոսադրույքի չափը` 6.5-7 տոկոս: Նշենք, որ Երեւանում այս թվերը համապատասխանաբար 30 եւ 8-8.5 տոկոս են:

Այս ծրագրի շահառուների համար ուղեցույց է տպագրվել` 30 հազար օրինակով, եւ բաժանվել է ծրագրում ընդգրկված  բանկերին ու վարկային կազմակերպություններին: