Նիդերլանդները բացատրություն են պահանջում Իրանից

Նիդերլանդների արտգործնախարարությունը Իրանի դեսպանից բացատրություն է պահանջել Թեհրանում մահապատժի ենթարկված հոլանդուհու հուղարկավորության կապակցությամբ, որն իրականացվել է հույժ գաղտնի պայմաններում` առանց ընտանիքի անդամների մասնակցության. տեղեկացնում է «Ֆրանս պրես» գործակալությունը:

Խորհրդակցությունների նպատակով Հաագա է կանչվել նաեւ Թեհրանում Նիդերլանդների դեսպանը:

Հոլանդիայի եւ Իրանի քաղաքացի` 46-ամյա Զահրա Բահրամիին ձերբակալել էին Իրանում անցյալ տարվա դեկտեմբերին` թմրանյութ պահելու մեղադրանքով, իսկ արդեն այս տարվա հունվարի 29-ին նրան կախաղան են բարձրացրել:

Կնոջ հարազատների պնդմամբ` պատճառն ամենեւին էլ թմրանյութը չէ. Զահրան Թեհրանում մասնակցել էր հակակառավարական ցույցերի:

Կնոջ մահապատժից հետո Նիդերլանդները դադարեցրել են Թեհրանի հետ պաշտոնական հարաբերությունները եւ Իրանի իշխանություններից պահանջել հարազատներին հանձնել նրա դին: Սակայն նրանց հայտնել են միայն Զահրային գերեզմանի մոտավոր վայրը: