ԿԱՊԻՏԱԼ. Եգիպտոսում աշխատավարձերը կբարձրանան

Եգիպտոսում կենսաթոշակները, ինչպես նաև բյուջետային աշխատողների աշխատավարձերը 15%-ով կբարձրանան, ինչի հետևանքով վեց միլիոն եգիպտացիների եկամուտները կավելանան: Այս մասին նախօրեին հայտնել է Եգիպտոսի ֆինանսների նախարար Սամիր Ռադվանը:

Նոր կառավարության առաջին նիստի ընթացքում նա հայտարարել է, որ այս նպատակով հատկացվել է շուրջ 960 մլն դոլար: Ինդեքսավորված աշխատավարձերը կվճարվեն 2011 թ. ապրիլի 1-ից:

Եգիպտոսի նոր կառավարությունը, որի երդմնակալության արարողությունը տեղի էր ունեցել 2011 թ. հունվարի 31-ին, հայտարարել է, թե իր համար առաջնահերթություն է լինելու Եգիպտոսի քաղաքացիների կենսամակարդակի բարձրացումը:

Հիշեցնենք, որ Եգիպտոսի վարչապետ Ահմեդ Նազիֆի գլխավորած նախկին կառավարությունը ցրվել էր Եգիպտոսում հունվարի 25-ից տեղի ունեցող հուզումների և խռովությունների հետևանքով: