Հաղթանակ տոնեց միայն Պետրոսյանը

Մոսկվայում մեկնարկեց «Աերոֆլոտ-օփեն» բաց փառատոնի հոբելյանական` 10-րդ մրցաշարը: Գլխավոր մրցաշարին մասնակցում էին նաև 4 հայ գրոսմայստերներ` Սերգեյ Մովսիսյանը, Տիգրան Լ. Պետրոսյանը, Ավետիք Գրիգորյանը և Գրիգոր-Սևակ Մխիթարյանը:

Մեկնարկային մրցափուլում հայ շախմատիստներից առավել հաջող հանդես եկավ Տիգրան Պետրոսյանը, ով սպիտակ խաղաքարերով հաղթանակ տարավ ռուսաստանցի Նիկիտա Վիտյուկովիի նկատմամբ: Սերգեյ Մովսիսյանին չհաջողվեց օգտագործել սպիտակ խաղաքարերի առավելությունը , և նրա պարտիան չինացի Յանգու Յուի հետ ավարտվեց խաղաղ արդյունքով: Ավետիք Գրիգորյանը սև խաղաքարերով ոչ-ոքի ավարտեց հանդիպումը մոլդովացի Վիկտոր Բոլագանի հետ, իսկ Գրիգոր-Սևակ Մխիթարյանը, նույնպես սև խաղաքարերով, հաշտություն կնքեց ռուսաստանցի Ալեքսանդր Խալիֆմանի հետ:

2-րդ մրցափուլում Տիգրան Պետրոսյանը սև խաղաքարերով կհանդիպի ռուս շախմատիստ Միխայիլ Կովիլայի, իսկ Սերգեյ Մովսիսյանը` մեկ այլ ռուսաստանցի շախմատիստի` Դմիտրի Բոշարովի հետ: Մեր մյուս գրոսմայստերները հանդես կգան սպիտակ խաղաքարերով. Ավետիք Գրիգորյանը կխաղա Իսրայելի ներկայացուցիչ Էմիլ Սուտովսկու, իսկ Գրիգոր-Սևակ Մխիթարյանը` Իգոր Լիսիի հետ: