Հայաստանը կունենա ճգնաժամային կառավարման կենտրոն

Մոտ մեկ տարվա ընթացքում Հայաստանը կունենա ճգնաժամային կառավարման կենտրոն. այսօր մամուլի ասուլիսի ժամանակ հայտարարեց արտակարգ իրավիճակների նախարար Արմեն Երիցյանը` հավելելով, որ 2010 թվականին ընդունվել է դրա հայեցակարգը:

Ըստ նախարարի` պետությունն արդեն կառուցում է կենտրոնի շենքը, իսկ սարքավորումները կտրամադրեն միջազգային կազմակերպությունները եւ դոնոր երկրները: Ծրագրի արժեքը մի քանի միլիոն դոլար է:

Արմեն Երիցյանը նաեւ տեղեկացրեց, որ Հայաստանում կգործի ամերիկյան 911 կամ եվրոպական 112 ծառայությունների նման ահազանգման կենտրոն. օգնության կհասնեն ե 'ւ ԱԻՆ, ե 'ւ իրավապահ մարմինների ներկայացուցիչները:

Հարցին, թե ի՞նչ ընթացքի մեջ է ԱԻՆ սեյսմիկ ծառայության պետ Ալվարո Անտոնյանի գործը, նախարարը տեղեկացրեց, որ այդ հարցով զբաղվում է հատուկ քննչական ծառայությունը, հարուցվել է քրեական գործ 179 հոդվածի երրորդ մասով: Ա.Անտոնյանը ազատվել է աշխատանքից իր դիմումի համաձայն, իսկ սեյսմիկ ծառայության պաշտոնակատար է նշանակվել պետի տեղակալ պ. Պետրոսյանը:

Հիշեցնենք ,որ Ալվարո Անտոնյանը սեյսմիկ ծառակության պետն էր և  մեղադրվում է միջազգային կառույցների կողմից տրամադրված գումարի յուրացման մեջ :