Բողոքի ակցիա` հանուն քաղբանտարկյալների ազատության

ՀԱԿ-ը պիկետ է կազմակերպել Հանրապետության հրապարակում` «Արմենիա–Մարիոթ» հյուրանոցի առջեւ, որտեղ պետք է իջեւանի ԵԽԽՎ մարդու իրավունքների հանձնակատար Թոմաս Համմարբերգը:

Ցուցարարների նպատակն էր Համմարբերգի ուշադրությունը սեւեռել Հայաստանում քաղբանտարկյալների գոյության վրա եւ պահանջում ազատ արձակել քաղբանտարկյալներին:

«Ազատություն», «Ազատություն, քաղբանտարկյալներին», «Հիմա» եւ այլ ավանդական կոչերով, ու տարբեր բովանդակությամբ պաստառներով ցուցարարները մոտ մեկ ժամ անցկացրին հյուրանոց առջեւ, իսկ այնուհետեւ շարժվեցին ԵԽ հայաստանյան գրասենյակ` Համարբերգին նամակ փոխանցելու համար:

«Համմարբերգի ականջին հաստատ կհասնի, բայց, այ, սրտին հասնելու խնդիր պետք է լուծենք»,- ասաց Քաղբանտարկյալների եւ հալածյալների պաշտպանության կոմիտեի համակարգող Կարապետ Ռուբինյանը, ավելացնելով, որ արդյունքի կհասնեն այսպես` բարոյական ճնշում գործադրելով: Նա շեշտեց նաեւ, որ մինչ այս Համմարբերգի արածն իրենց չի բավարարել:

ՀԱԿ համակարգող Լեւոն Զուրաբյանն էլ  նշեց, որ իրենց պայքարն արդեն իսկ լուրջ արդյունքներ է տվել: «Մենք ի վերջո պարտադրեցինք, որ 150-ից ավելի քաղբանտարկյալներն ազատ արձակվեն»,- ասաց Զուրաբյանը: