ՀԱՅԿԱԿԱՆ ԺԱՄԱՆԱԿ. Չոռնին խաբել է շեֆին

Երեւանի քաղաքապետ Գագիկ Բեգլարյանը երեկ հրաժարական տվեց: Մենք տեղեկացրել էինք, որ Բաղրամյան 26-ից Բեգլարյանին մինչեւ երկուշաբթի ժամանակ էին տվել՝ ներողություն խնդրել Սերժ Սարգսյանի արարողակարգի բաժնի աշխատակից Արամ Կանդայանից եւ ողջ բաժնից՝ Կանդայանին առեւանգելու եւ ծեծի ենթարկելու համար, կամ՝ հրաժարական տալ:

Ավելին, ըստ իշխանական մեր աղբյուրների, Սերժ Սարգսյանը պահանջել էր, որպեսզի այդ ներողությունը Բեգլարյանը հրապարակային խնդրի, այսինքն՝ ներողության տեսքտը տարածի իր մամուլի ծառայության միջոցով:

...Բեգլարյանն իր մերձավորների շրջանում հայտարարել է, որ ոչ ներողություն է խնդրելու, ոչ էլ հրաժարական է տալու: Բայց աղմուկը շատ մեծ էր, բացի այդ, Սերժ Սարգսյանի փեսան՝ Միքայել Մինասյանը (աշխատակազմի ղեկավարի տեղակալը), պնդել է, որ Բեգլարյանն իր արարքով ապտակ է հասցրել անձամբ Սերժ Սարգսյանին, եւ դա չի կարելի ներել: Ի վերջո, լուրջ ճնշումներին տեղի տալով, Բեգլարյանը դիմում գրեց: Բանն այն է, որ երեկ իշխանական կուլիսներում շրջանառության մեջ էին դրվել լուրեր, թե Բեգլարյանին ՀՀԿ-ից էլ են հեռացնելու, անգամ քրգործ են հարուցելու նրա դեմ: Նշված էր նաեւ, թե հնարավոր է, Գագիկ Բեգլարյանը լուրջ խնդիրներ ունենա նաեւ իր բիզնեսում: