Անթալիայում կբացվի ռուս-թուրքական բարեկամության այգին

Թուրքիայի հարավարևմտյան Անթալիա նահանգի Մուրաթփաշա շրջանում կբացվի ռուս-թուրքական բարեկամության այգի։

Մուրաթփաշայի քաղաքապետարանից հայտնում են, որ այգում տեղադրվել է ռուս հայտնի գրող Լև Տոլստոյի կիսանդրին։

Այգին հիմնվել է Չաղլայան թաղամասում՝ երկու երկրների միջև բարեկամական հարաբերությունների ամրապնդման նպատակով։ Այգու տարածքը մոտ երեք հազար քառակուսի մետր է:

Տոլստոյի կիսանդրին շրջանի քաղաքապետարանին են նվիրել Միջազգային համագործակցության ռուսական ասոցիացիան, Թուրքական բարեկամության ասոցիացիան և «Մշակույթների երկխոսություն-մեկ աշխարհ» հիմնադրամը։

Մուրաթփաշայի քաղաքապետարանի ղեկավար Ումիթ Ույսալը հայտնել է, որ, վերջին պաշտոնական տվյալներով, Անթալիայում մշտական հիմունքներով ապրում է 95 հազար օտարերկրացի շուրջ 90 երկրից։ Ըստ նրա՝ Անթալիայում ապրում է մոտ 20 հազար ռուս, որոնք քաղաքն իրենց տունն են համարում։

Այգու բացման արարողությունը նախատեսված է հոկտեմբերի 23-ին: