Թրամփը քննադատել է Բայդենին «Հյուսիսային հոսք-2»-ի նախագծին չխոչընդոտելու համար

ԱՄՆ նախկին նախագահ Դոնալդ Թրամփը քննադատել է ԱՄՆ ներկայիս ղեկավար Ջո Բայդենին «Հյուսիսային հոսք-2» գազատարի հարցում թույլ դիրքի համար:

Ելույթ ունենալով Հանրապետական կուսակցության՝ Հյուսիսային Կարոլինայում կայացած տարեկան համագումարում՝ Թրամփը մեղադրել է Բայդենին ամերիկացի աշխատողներին զրկելու գազի ոլորտում աշխատելու հնարավորությունից:

«Բայդենի վարչակազմն ավելի քիչ է գնահատում Ամերիկան: Keystone XL գազատարի շինարարությունը չեղյալ հայտարարելու՝ Բայդենի որոշման պատճառով 48000 աշխատատեղ է պակասել: Նա որոշել է դադարեցնել մեր գազատարի շինարարությունը, բայց հաստատել է ռուսականի շինարարությունը», - ասել է Թրամփը:

Նրա խոսքով՝ իր նախագահության ընթացքում ինքը կարողացել է լավ անձնական հարաբերություններ պահպանել ՌԴ նախագահ Վլադիմիր Պուտինի հետ, բայց Ռուսաստանի նկատմամբ իր քաղաքականությունը շատ կոշտ էր:

Հիշեցնենք, որ շաբաթներ առաջ Բայդենը հայտարարել էր, որ «ԱՄՆ–ը չի կարողացել խոչընդոտել «Հյուսիսային հոսք-2»-ի նախագծի շինարարությանը»։