Թուրքական զորքերը և Թուրքիայի աջակցությունը վայելող ռազմական խմբավորումներն Սիրիայում անցել են ինտեսիվ հարձակման. Ռազմական փորձագետ

Սիրիական բանակը ռմբակոծում է Քումայնասի, Թալ Մուսայբինի և Արիհայի թուրքական հենակետերը, իսկ ռուսական ռազմօդուժը ռմբակոծում է Շահրանազի և Հորթա Ջաբալ Շաշաբուլի այն հենակետերը, որոնք գտնվում են թուրքական կողմի աջակցությունը վայելող ռազմական խմբավորումների ձեռքում. ըստ Yerkir.am-ի՝ այս մասին ֆեյսբուքյան իր էջում գրել է ռազմական փորձագետ, քրդագետ Կարեն Հովհաննիսյանը: Գրառումը ամբողջությամբ՝ ստորև.

«Ըստ որոշ աղբյուրների, այս պահին թուրքական զորքը և Թուրքիայի աջակցությունը վայելող ռազմական խմբավորումներն, այսօր կեսօրից հետո անցել են ինտեսիվ հարձակման: Հրթիռակոծել են Իդլիբի շրջանի Ալ-Նայրաբ քաղաքը, ինչի արդյունքում այժմ քաղաքի կեսը գտնվում է թուրքերի վերահսկողության տակ:

Այս պահին Ալ-Նայրաբում ցամաքային ռազմական գործողություններ են ընթանում: Միևնույն ժամանակ հաղորդվում է, որ սիրիական բանակը ռմբակոծում է Քումայնասի, Թալ Մուսայբինի և Արիհայի թուրքական հենակետերը, իսկ ռուսական ռազմօդուժը ռմբակոծում է Շահրանազի և Հորթա Ջաբալ Շաշաբուլի այն հենակետերը, որոնք գտնվում են թուրքական կողմի աջակցությունը վայելող ռազմական խմբավորումների ձեռքում»,- գրել է նա: