Փայլանի կուսակիցը մեջլիսում «Քուրդիստան» բառն արտասանելու համար տուգանվել է 3400 դոլարով

Թուրքիայի քրդամետ Ժողովուրդների դեմոկրատական կուսակցության պատգամավոր Օսման Բայդեմիրը տուգանվել է մոտ 3400 ԱՄՆ դոլարով՝ խորհրդարանական ելույթներից մեկի ժամանակ «Քուրդիստան» բառն արտասանելու համար: Ըստ Demokrathaber-ի՝ դրամական տույժը պահվել է Բայդեմիրի դեկտեմբերյան աշխատավարձից:

Նշենք, որ սա առաջին դեպքն է, որ փաստացի պատգամավորը տուգանվում է իշխող կուսակցության կողմից ներկայացված` «Քուրդիստան» ու «Ցեղասպանություն» բառերի կիրառումն արգելող կետերը խախտելու համար:

Նույն արգելքի համար նախորդ տարի մեջլիսի երեք նիստի մասնակցելու իրավունքից էր զրկվել հայ պատգամավոր Կարո Փայլանը, ով կիրառել էր «Հայոց ցեղասպանություն» եզրույթը: