ԱՄՆ-ում և Կանադայում հայ ուսանողները լուռ բողոքի ակցիայի են մասնակցել` ընդդեմ Ցեղասպանության ժխտման

ԱՄՆ-ում և Կանադայում բնակվող հայ ուսանողները փետրվարի 9-ին մասնակցել են «Ժխտման բիծը» խորագիր կրող ամենամյա լուռ բողոքի ակցիային` ընդդեմ Հայոց ցեղասպանության շարունակական ժխտման:

Ինչպես հաղորդում է The Armenian Weekly-ն, բողոքի ցույցերը համակարգվել են Համահայկական ուսանողական ասոցիացիայի կողմից: «Ժխտման բիծը» միջոցառումն առաջին անգամ նախաձեռնվել է 2011-ին` որպես լուռ բողոքի ցույց, որն ուղղված է բարձրացնելու իրազեկությունը Ցեղասպանության և դրա ճանաչման անհրաժեշտության հարցերի շուրջ:

Լուռ ակցիայի ընթացքում ցուցարարները պաստառներ են պատրաստել`Ցեղասպանությունը ճանաչելու կոչ անող տարբեր կարգախոսներով: Ցույցերն անցկացվել են համալսարանական շենքերի և այլ հաստատությունների դիմաց:

Այս տարի ցույցերին մասնակցող կրթական հաստատությունների թվում էին Սան Դիեգոյի Կալիֆոռնիայի համալսարանը, Լոս Անջելեսի Կալիֆոռնիայի համալսարանը, Սանտա Բարբարայի համալսարանը, Փասադենայի համայնքային քոլեջը, Գլենդելի համայնքային քոլեջը, Եյլի համալսարանը և Փրինսթոնի համալսարանը: