Երևանում առաջիկայում կտեղադրվի «Արարատ-73»-ի ֆուտբոլիստների արձանախումբը

Երևանում առաջիկայում կտեղադրվի «Արարատ-73»-ի ֆուտբոլիստների արձանախումբը. Ազգային ժողովում լրագրողների հետ զրույցում հայտնեց Երևանի քաղաքապետի առաջին տեղակալ Կամո Արեյանը:

«Մենք, ավագանու որոշմամբ, արդեն հավանություն տվել ենք տեղին: «Հրազդան» մարզադաշտի հարևանությամբ կունենանք «Արարատ-73» թիմի ֆուտբոլիստների արձանախումբ»,- ասաց նա:

Հարցին, թե բոլոր ֆուտբոլիստների արձաննե՞րն են լինելու, Արեյանը դժվարացավ հստակ պատասխանել:

«Ճիշտն ասած, ես լավ չեմ տիրապետում, թե քանի ֆուտբոլիստի արձան կլինի, բայց կարող եմ ասել, որ լինելու է արձանախումբ: Կարծում եմ, որ նրանք արժանի են: Մենք մեր արժեքներով պիտի հպարտանանք, արձանները պետք է դառնան մեր կյանքի մասնակիցը»,- ասաց փոխքաղաքապետը: