Պոլսո հայոց պատրիարք Մութաֆյանի ներկայացուցիչ է նշանակվել նրա մայրը

Պոլսի վարչական գործերով 4-րդ դատարանի որոշմամբ՝ Պոլսո հայոց պատրիարք Մեսրոպ Մութաֆյանի ներկայացուցիչ է նշանակվել նրա մայրը՝ Մարի Մութաֆյանը:

Ըստ «Ակօս»-ի՝ հիվանդության պատճառով Մութաֆյանի համար ներկայացուցիչ նշանակելու պահանջով դատավարության ընթացքում նրա փոխանորդ Արամ արքեպիսկոպոս Աթեշյանի փաստաբանը պահանջել է մերժել այդ պահանջը, սակայն, ապացուցված համարելով, որ պատրիարքը հիվանդության պատճառով չի կարող իր պարտականությունները կատարել, դատարանը որոշել է Հայոց պատրիարքի ներկայացուցիչ նշանակել պատրիարքի մորը՝ Մարի Մութաֆյանին:

Թեև Պոլսո հայոց պատրիարքարանի կանոնադրությամբ պատրիարքն ընտրվում է ցմահ, մի շարք պոլսահայեր նպատակահարմար են գտնում նոր պատրիարք ընտրել, քանի որ Մութաֆյանը  հիվանդության պատճառով չի իրականացնում պարտականությունները։  Այնուամենայնիվ, ոմանք էլ կարծում են, որ պետության կողմից նրա փոխանորդ նշանակված Աթեշյանը պետք է իրականացնի պատրիարքի պարտականությունները: