Հրատապ. Մովսեսը ինտենսիվ գնդակոծվում է

Հենց այս պահին հակառակորդը դարձյալ կրակում է Տավուշի մարզի սահմանապահ Մովսես գյուղի վրա: Մովսեսի գյուղապետ Արարատ Ավալյանը Yerkir.am-ին հայտնեց, որ մոտ 1-1.5 ժամ առաջ հակառակորդը սկսել է խոշոր տրամաչափի' ԴՇԿ տեսակի գնդացիրներից ինտենսիվ կրակել Մովսեսի ուղղությամբ: Մեզ հետ զրուցելու պահին' հեռախոսով, լսվում էին կրակոցների ձայները, ու լսվեց ուժեղ պայթյուն: Գյուղապետը տեղեկացրեց, որ դա ադրբեջանցի զինծառայողների կողմից հայկական մարտական դիրքերի ուղղութամբ արձակված նռնականետի արկի պայթյուն էր:

Արարատ Ավալյանը Yerkir.am-ին ասաց նաեւ, որ հակառակորդը անկանոն կրակում է Մովսեսի տների վրա: Այս պահին' հաշվի առնելով ուշ ժամը' մութը, եւ շարունակվող գնդակոծությունը, դեռեւս հնարավոր չէ պարզել, թե որտեղ կամ ինչ վնաս են հասցրել հակառակորդի գնդակները: Գյուղապետն էլ մեզ հետ զրուցելու պահին դրսում' քիչ թե շատ ապահով տեղում կանգնած, հետեւում է, որ հանկարծ գյուղի ինչ-որ մասում հրդեհ բռնկվելու դեպքում շտապ ինչ-որ օգնություն ցուցաբերեն...