Քենիայում որսագողերն ավելի քան 100 փիղ են սպանել

Քենիայի վայրի բնության պահպանության ծառայությունը մաքսանենգներից առգրավել է փղոսկրի այս տարվա ամենամեծ խմբաքանակը: Հանուն այդ փղոսկրի, նախնական գնահատականներով, սպանվել է առնվազն 114 փիղ:

BBC-ի տեղեկացմամբ` մեկ կասկածյալ է ձերբակալվել Մոմբասի նավահանգստում ոստիկանության իրականացրած գործողության արդյունքում:

Մաքսանենգները լայնորեն օգտվում են Քենիայի և Տանզանիայի նավահանգիստներից` ապօրինի ապրանքն ասիական շուկաներ ուղարկելու համար:

Վերջին տարիներին որսագողությունը մեծ տարածում է գտել Քենիայում` պայմանավորված Չինաստանում և Հարավարևելյան Ասիայում փղոսկրի պահանջարկի մեծացմամբ: Այդ վայրերում փղոսկրն օգտագործում են զարդերի պատրաստման և ժողովրդական բժշկության մեջ: