Ինչու Իվանիշվիլին չի ցանկանում նախագահ դառնալ

Գերմանական Deutsche Welle-ին տված հարցազրույցում Վրաստանի վարչապետ Բիձինա Իվանիշվիլին պարզաբանել է, թե ինչու չի առաջադրում իր թեկնածությունը նախագահական ընտրություններում:

«Ես որոշել եմ հեռանալ քաղաքականությունից նախագահական ընտրություններից հետո: Այդ պատճառով չեմ առաջադրվում նախագահի պաշտոնում, սակայն այլ պատճառ էլ կա` ըստ Սահմանադրության`  վարչապետի պաշտոնն ավելի կարեւոր է, քան նախագահինը»,- ասել է նա:

Ըստ Իվանիշվիլիի` «Վրացական երազանք» դաշինքի կողմից առաջադրված թեկնածուն` Գեորգի Մարգվելաշվիլին, փորձառու, կրթված, ստեղծագործող եւ թիմային խաղացող է, ունի նախագահին հարիր բոլոր հատկությունները, բացի դրանից` լիազորությունների ժամկետը լրանալուց հետո չի կառչի աթոռից: