Նախիջեւանը` մղձավանջային դժոխք եւ կտտանքների պոլիգոն

Ադրբեջանական «Հասարակական պալատ» ժողովրդավարության համար շարժումը հանդես է եկել հայտարարությամբ, որում մտահոգություն է հայտնում Նախիջեւանում մարդու իրավունքների ոտնահարման կապակցությամբ. տեղեկացնում է contact.az-ը:

Նշվում է, որ, Ալիեւների դինաստիայի իշխանության պահից սկսած, ժողովրդավարության նվաճումները գնալով նվազում են: «Այդ վարչակարգը մեթոդաբար ոչնչացնում է հիմնարար ազատությունները` հավաքների, խոսքի, մամուլի, արտահայտման, ոտնահարում է սեփականության իրավունքը եւ ազատ տնտեսության սկզբունքները: Երկրում տիրում է կոռուպցիան եւ չինովնիկական ամենաթողությունը»,- ասվում է հայտարարության մեջ եւ ընդգծվում, որ թեեւ ամբողջ երկրում է այդ վիճակը, սակայն ամենամտահոգիչ իրադրությունը Նախիջեւանում է. այն վերածվել է մղձավանջային դժոխքի եւ կտտանքների պոլիգոնի, դարձել է վտանգավոր վայր` քաղաքական, սոցիալական եւ աշխարահաքաղաքական առումներով:

Այդ կապակցությամբ շարժումը կոչ է անում միջազգային հանրությանը մեծացնել ուշադրությունը Ադրբեջանում, մասնավորապես` Նախիջեւանում մարդու իրավունքների խնդիրների նկատմամբ: