Ընդդիմությունն այլ նպատակներ ունի

Ընդդիմությունը թեեւ տվյալ պահին հայտարարում է, թե իշխանությունների հետ երկխոսելու միակ թեման արտահերթ ընտրություններն են,  սակայն դա այդպես չէ. այսօր լրագրողների հետ հանդիպման ժամանակ ասաց ԱԺ ՀՀԿ պատգամավոր Մանվել Բադեյանը: «Էդտեղ բանակցելու բան չկա: Ընդդիմությունն ասում է` գնացեք արտահերթ ընտրությունների, իշխանությունն ասում է` չէ: Պրծան բանակցությունները: Իսկ եթե բանակցություններ կան, ապա ուրիշ բանի շուրջ են»,- նշեց նա:

Ըստ ՀՀԿ-ական պատգամավորի` իշխանությունն ունի մեկ նպատակ` հավասարակշռել հասարակության քաղաքական-հոգեբանական բեւեռացումները, հարթել սուր անկյունները եւ ստեղծել ներդաշնակ հասարակություն:

Իսկ ահա ընդդիմության նպատակներն այլ են: Պատգամավորի խոսքերով` ընդդիմությունը հասկացել է, որ ո'չ ընտրությունների, ո'չ էլ զանգվածային անհնազանդության ակցիաներ կազմակերպելու միջոցով իշխանության չի գա: Եվ ցանկանում է ամրապնդել իր ազդեցությունը հասարակության շրջանում եւ իշխանության` որոշումներ կայացնելու մեխանիզմի վրա: