Աշնանը կմեկնարկի նոր ուսումնական ծրագիրը

Արցախում աշնանը մեկնարկելու է նոր՝ «Ուսումնական ռազմավարություն» ծրագիրը, որի մանրամասները երեկ քննարկվել են ԼՂՀ վարչապետ Արա Հարությունյանի հետ հանդիպման ժամանակ։

Վարչապետն ընդունել է Հայաստանի ամերիկյան համալսարանի նախագահ Բրյուս Պողոսյանին, համալսարանի հիմնադիրներից` Արմեն Տեր-Կյուրեղյանին, ՆՈՒՌ (նոր ուսումնական ռազմավարություն) ծրագրի համակարգող Սեբաստիան Արիես Դյուվալին եւ ՀԲԸՄ Հայաստանի ու Արցախի գրասենյակների համակարգողներին:

Հանդիպման ընթացքում ներկայացվել է ՀԲԸՄ համաֆինանսավորմամբ իրականացվող ծրագրի համակարգչայնացման մասը։ Ըստ նշված ծրագրի՝ համակարգիչ կստանան Արցախի տարրական դասարանի աշակերտները։ Համակարգիչն արդեն հայերենացվել է. տեղեկացրել են ծրագրի կազմակերպիչները։

Քննարկվել են նաեւ Հայաստանի ամերիկյան համալսարանի` Արցախում իրականացվող եւ իրականացվելիք ծրագրերը։