Երևանն որոշում ընդունելիս պետք է հաշվի առնի Եվրամիության փոփոխվող բնույթը. ՌԴ փոխվարչապետ

Եվրամիոթյանը հնարավոր անդամակցելու որոշումը հայ ժողովրդի ընտրությունն է, սակայն Երևանը պետք է հաշվի առնի Եվրամիության փոփոխվող բնույթը, որը տնտեսական միությունից վերածվում է ռազմաքաղաքականի։ ՏԱՍՍ-ի հաղորդմամբ, այս մասին լրագրողներին ասել է Ռուսաստանի փոխվարչապետ Ալեքսեյ Օվերչուկը։

«Եթե նրանք երբևէ արդեն պաշտոնապես սկսեն նման բանակցություններ, դրանք կտևեն երկար տարիներ։ Եվ, իհարկե, անհրաժեշտ կլինի դիտարկել Եվրոպական Միության դինամիկան, թե ինչի է այն վերածվում։ Եվ այստեղ, իհարկե, մենք պետք է նաև վերահսկենք և հետևենք Եվրահանձնաժողովի և Բրյուսելի այսօրվա հայտարարություններին, որոնք կապված են այն փաստի հետ, որ Եվրամիությունը տնտեսական միությունից վերածվում է ռազմաքաղաքական միության։ Սա նույնպես պետք է հաշվի առնել։ Եվ Եվրամիության էությունը փոխվում է մեր աչքերի առաջ», - նշել է նա։

Օվերչուկը հարցադրում է արել, թե արդյո՞ք հայերը պատրաստ են միանալ ռազմաքաղաքական դաշինքին, որն այժմ շատ ագրեսիվ է տրամադրված Ռուսաստանի Դաշնության նկատմամբ:

«Հնարավոր է՝ հայերը նույնպես ստիպված լինեն իրենց տալ այս հարցը: Ամեն դեպքում, իհարկե, բազմիցս նշվել է, որ այս կամ այն ինտեգրացիոն միավորման օգտին ընտրությունը միշտ հայ ժողովրդի ընտրությունն է։

Եվ այստեղ, ակնհայտ է, որոշակի պահի ինչ-որ որոշումներ պետք է կայացվեն, քանի որ, իրոք, սա շատ է քննարկվել, թե՛ այստեղ, թե՛ Հայաստանում, Նիկոլ Վովաևիչը խոսել է այդ մասին. բոլորը հասկանում են, որ Հայաստանը չի կարող միաժամանակ լինել երկու ինտեգրացիոն միավորումների անդամ: Հետևաբար, եթե երբևէ նման ընտրություն կատարվի, այն կլինի համապարփակ՝ հաշվի առնելով այն դինամիկան, որը մենք այսօր տեսնում ենք Եվրամիության փոփոխվող բնույթում», - ասել է ՌԴ փոխվարչապետը: