3 մլն դրամ գրավ. Սամվել և Սեյրան Դարբինյանների խափանման միջոցը փոխվել է

Վանաձորի նախկին քաղաքապետ Սամվել Դարբինյանի և նրա եղբոր` Սեյրան Դարբինյանի խափանման միջոց տնային կալանքը փոխվել է։ Տեղեկությունը Sputnik Արմենիային հայտնել է նրանց փաստաբան Ռուբեն Հակոբյանը՝ նշելով, որ Վերաքննիչ դատարանը բավարարել է իրենց հայցը։

«2 խափանման միջոց է կիրառվել՝ ազատ են արձակել 3 մլն դրամ գրավի դիմաց, և նրանց նկատմամբ վարչական հսկողություն ու բացակայելու արգելք է սահմանվել։ Դատախազը կարծում էր, որ անգամ տնային կալանք պետք չէ կիրառել, նա միջնորդել էր խափանման միջոցը կալանք դարձնել, սակայն դատարանը մերժեց հանրային մեղադրողին»,– ասաց Հակոբյանը։

Հիշեցնենք, որ հունիսի 23–ին Սամվել Դարբինյանը և ևս 4 անձ ձերբակալվեցին: Նրանց նկատմամբ հանրային քրեական հետապնդում է հարուցվել ՀՀ քրեական օրենսգրքի 296-րդ հոդվածի 3-րդ մասի 2-րդ և 3-րդ կետերով (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացում)։

Հունիսի 24-ին հայտնի դարձավ, որ Սամվել և Սեյրան Դարբինյանների նկատմամբ տնային կալանք է կիրառվել։

Սամվել Դարբինյանը Վանաձոր համայնքի ղեկավարի պաշտոնը զբաղեցրել է 1999–2016 թթ։