Իսրայելը և Իրանը գիշերը նոր հարվածներ են հասցրել միմյանց

Իսրայելի պաշտպանության բանակը (ԻՊԲ) հայտարարել է, որ գիշերը հարվածներ է հասցրել Թեհրանին՝ թիրախավորելով տասնյակ օբյեկտներ։ Հարվածների համար գործի են դրվել 60-ից ավելի կործանիչ։

Հարվածներն իրականացնելու համար օգտագործվել է շուրջ 120 զինամթերք, որոնք ուղղված են եղել Թեհրանի շրջանում հրթիռների արտադրության վայրերին և միջուկային հետազոտական ​​կենտրոնին, որն, ըստ Իսրայելի բանակի, ներգրավված է Իրանի միջուկային զենքի մշակման մեջ:

ԻՊԲ-ն նաև նշում է, որ հարված է հասցրել երեք հրթիռային կայանքների, որոնք պատրաստվում էին Իսրայելի ուղղությամբ հրթիռներ արձակել։ 

Իրանը ևս հրթիռային հարվածներ է հասցրել Իսրայելին։ Մարդկանց հրահանգվել է ապաստարաններ մտնել։ 

Իրանական Tasnim գործակալությունը նշում է, որ Իսլամական հեղափոխության պահապանների կորպուսը (ԻՀՊԿ) հարվածների 15-րդ ալիքն է ուղղել Իսրայելի դեմ։ Ըստ ԻՀՊԿ-ի՝ հիբրիդային հարձակման մեջ ներգրավվել են հրթիռներ և 100-ից ավելի անօդաչուներ, որոնք ուղղված են եղել Հայֆայում և Թել Ավիվում ռազմական թիրախների և ռազմական արդյունաբերության օբյեկտների դեմ։