Լսվել են կրակոցներ, պարզ չի եղել` որ կողմից. Գեղարքունիքի մարզպետը` Սոթքի դիրքերում վերջերս գրանցված կրակոցների մասին

Ես սահմանին եղել եմ, ամեն բան խաղաղ է եղել ու ոչ մի տագնապալի բան չկա։ Այս մասին կառավարության նիստից հետո լրագրողների հետ զրույցում ասել է Գեղարքունիսի մարզպետ Կարեն Սարգսյանը։ 

«Սահմանին կրակոցներ լսվել են, պարզ չի եղել, թե որ կողմից է եղել։ Բնակիչները ձայներ են լսել»,-ասաց նա ՝ ընդգծելով, որ թե ինչ ուղղությամբ են եղել կարող է պարզաբանել միայն ՊՆ-ն։

Հարցին, թե արդյոք կրակոցները չեն խոչընդոտում Սոթքի հանքավայրի աշխատանքներին՝ Սարգսյանն ասաց, որ հանքավայրը բնականոն աշխատում է ու որևէ դադար այդ առումով չի եղել։     

Դիտարկմանը, թե որպես Գեղարքունիսի մարզպետ՝ իրեն չի մտահոգում այն, որ մարզի որոշ հատվածներ շարունակում է զավթված մնալն Ադրբեջանի կողմից, սակայն ՀՀ իշխանությունները դրանց վերադարձի հարցը չեն բարձրացնում՝ Սարգսյանը պատասխանեց, որ սխալ է դիտարկումը, թե ՀՀ իշխանությունները այդ հարցը չեն բարձրացնում։ 

«Մենք ասել ենք, որ սահմանազատման դեպքում մենք այդ հարցը կբարձրացնենք»,-ասաց նա։