Գիշերը Ռուսաստանի երկնքում խոցվել է Ուկրաինայի ԶՈւ-ի 126 անօդաչու թռչող սարք. ՌԴ ՊՆ

Ռուսաստանի պաշտպանության նախարարությունը հայտնել է, որ մարտի 15-ի գիշերը ՀՕՊ ուժերն աշխատել են Վոլգոգրադի, Վորոնեժի, Բելգորոդի, Բրյանսկի, Ռոստովի և Կուրսկի մարզերում:

Գերատեսչության տվյալներով` ընդհանուր առմամբ ոչնչացվել է 126 անօդաչու թռչող սարք։

Մասնավորապես, Վոլգոգրադի մարզի երկնքում հակաօդային պաշտպանության ուժերը խոցել են 64, Վորոնեժի մարզում՝ 38, Բելգորոդի մարզում՝ 14, Բրյանսկի մարզում՝ 7, Ռոստովի մարզում՝ 2, Կուրսկում՝ 1 ԱԹՍ։

Սարատովի և Վոլգոգրադի օդանավակայաններում ինքնաթիռների ընդունման և ուղարկման համար գիշերը սահմանափակումներ են մտցվել։ Առավոտյան երկու օդանավակայաններն էլ բնականոն ռեժիմով վերսկսել են աշխատանքը։

Հիշեցնենք՝ 2022 թվականի փետրվարի 24-ին սկսվեց Ռուսաստանի և Ուկրաինայի միջև զինված հակամարտություն՝ Ռուսաստանի զինված ուժերի կողմից Ուկրաինայի տարածք ներխուժմամբ։ Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր վայրերում։ Մարտական գործողություններն ընթանում են մինչ օրս։