Այլևս չենք կարող լռել․ աշխարհի հայ հոգևորականները գերիների վերաբերյալ հրատապ կոչ են հղել

Աշխարհի հայկական եկեղեցիների միացյալ ներկայացուցիչները միասնաբար դիմել են աշխարհի քրիստոնյաներին՝ Ադրբեջանում պահվող հայ գերիներին անհապաղ ազատ արձակելու հրատապ կոչով:

Տարածված հայտարարությունում շեշտվում է, որ այս շարունակական կալանքը մարդկային պարկեշտության և քրիստոնեական կարեկցանքի բոլոր սկզբունքների ոտնահարում է։

«Հանուն մեր ընդհանուր հավատքի մենք այլևս չենք կարող լռել: Հիմա գործելու ժամանակն է: Գերիների նկատմամբ անմարդկային վերաբերմունքը հակասում է մեր հավատքի բուն էությանը: Պետք է վերջ դնել նրանց հանդեպ բռնությանը, տառապանքին ու զրկանքներին»,- նշված է կոչում, որը ստորագրել են ավելի քան 100 հոգևորականներ:

Նրանք ընդգծել են, որ իրավիճակի լրջությունը հասկանալը չափազանց կարևոր է, քանի որ Արցախի նախկին պետնախարար Ռուբեն Վարդանյանի առողջական վիճակն օրեցօր վատթարանում է. ամեն հաջորդող օրը չափազանց ծայրահեղ է դարձնում իրավիճակը:

Ըստ հոգևորականների` տարածաշրջանի բոլոր ժողովուրդները՝ հայեր, ադրբեջանցիներ, ցանկացած այլ ազգություն, արժանի են խաղաղության, իսկ այն կառուցվում է արդարության հենքի վրա։ Նրանք հավատում են, որ հայ գերիներին ազատ արձակելը կարող է նոր էջ բացել, որտեղ առողջացումը կփոխարինի ատելությանը, և խաղաղությունը կլինի ոչ թե պարզապես երազանք, այլ իրականություն:

Աշխարհի տարբեր երկրների հայ հոգևորականները կառավարություններին, միջազգային կազմակերպություններին կոչ են արել դատապարտել այս ցուցադրական դատավարությունը՝ որպես քաղաքական և ոչ լեգիտիմ, ճնշում գործադրել գերիներին ազատ արձակելու համար։

Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք: