Կամչատկայում կործանված Մի-8 ուղղաթիռում եղած բոլոր 22 մարդիկ զոհվել են

Կամչատկայում կործանված Մի-8 ուղղաթիռում գտնվող բոլոր 22 մարդիկ զոհվել են, հայտնում են ՏԱՍՍ-ը և ՌԻԱ Նովոստին՝ վկայակոչելով արտակարգ իրավիճակների ծառայությանը։

Ռուսաստանյան լրատվամիջոցների հաղորդմամբ, ուղղաթիռում եղել է 19 զբոսաշրջիկ և անձնակազմի 3 անդամ։

Ինչպես ՏԱՍՍ-ին հայտնել են ՌԴ արտակարգ իրավիճակների նախարարությունից, փրկարարները հայտնաբերել են 17 մարդու դի։ Որոնողական աշխատանքները շարունակվում են։

Ինչպես հայտնում է Коммерсантъ-ը, ուղղաթիռում եղել է Ռուսաստանի ֆուտբոլային միության ֆինանսական տնօրեն Արսենի Զամյատինը կնոջ՝ Պոլինայի հետ։

Ըստ նախնական տվյալների, ուղղաթիռը կարող էր կործանվել օդաչուի սխալի պատճառով։ «Բարդ եղանակային պայմաններում օդաչուի սխալը առաջնային տարբերակ է դիտարկվում։

Մառախուղի մեջ օդաչուն կարող էր չնկատել բլուրը և բախվել լանջին»,- հայտնել են շտաբից։ Չի բացառվում նաև տեխնիկայի անսարքության վարկածըլ։

Ուղղաթիռի բեկորները հայտնաբերվել են օդից՝ որոնողական աշխատանքների ժամանակ։ Ավիավթարի հետաքննությունն իրականացնում են Միջպետական ​​ավիացիոն կոմիտեն և Ռոսավիացիան։